Балалар үшін спорт секциялары тегін болады

Бұл жағымды жаңалықты облыс әкімі әлеуметтік желіден жазды. Оның айтуынша, өңірдегі 27 спорт мектебінде 13 мыңнан астам бала оқиды. Солтүстік Қазақстанда 3 мың спорттық нысан бар.

- Соңғы бір жылда аудан орталықтарында 2 заманауи спорттық-сауықтыру кешені ашылды. Тағы 5 спорт орталығының құрылысы жалғасуда. Өткен қыста аудандарда 3 хоккей корты қолданысқа берілді. Жыл соңына дейін тағы 2 хоккей кешенін ашамыз. Дарынды жас спортшыларымыз оқитын мектеп-интернат-колледжге арналған жатақхананың құрылысы басталды. Президенттің тапсырмасы бойынша спорттағы мемлекеттік тапсырыс жобасы жүзеге асырылуда. Бұл ата -аналар мен балалар үшін керемет жаңалық. Облыста 3 мыңнан астам бала ақылы спорт секцияларында айналысады. Енді олардың барлығы тегін секциялармен қамтылатын болады,- деп жазды Құмар Ақсақалов.

⠀