Қазан айынан мүгедек адамдар жаңа жәрдемақы алады

Келесі айдан мүгедек адамдар жаңа жәрдемақы ала бастайды. Бұл туралы ҚР Еңбек және халықты әлеуметтік қорғау вице-министрі Ерлан Әукенов айтты, деп хабарлайды 7152.kz тілшісі ҚазАқпаратқа сілтеме жасап. 

-2019 жылы Үкімет қаулысымен мүгедек адамдардың құқықтарын қамтамасыз ету және тұрмыс сапасын жақсарту жөніндегі ұлттық жоспар қабылданды. Ұлттық жоспар мүгедектігі бар адамдарды әлеуметтік қорғау саласындағы үйлестіру кеңесінің, жұртшылықтың қатысуымен әзірленді және 7 бағытты қамтиды, 64 іс-шарадан тұрады, оны 7 (жеті) орталық мемлекеттік орган іске асырады. Ұлттық Жоспарды іске асыру үшін Еңбек министрлігі мүгедектігі бар адамдардың құқықтары мен әлеуметтік қорғалуын қамтамасыз ету саласындағы заңнаманы жетілдіруде, - деді ол Орталық коммуникациялар қызметіндегі баспасөз мәслихатында.

Өткен бейсенбі, 23 қыркүйекте Парламент Сенатының жалпы отырысында «Қазақстан Республикасының кейбір заңнамалық актілеріне азаматтардың жекелеген санаттарын әлеуметтік қорғау мәселелері бойынша өзгерістер мен толықтырулар енгізу туралы» Заң қаралып, мақұлданды.

- Жақын арада заң Мемлекет басшысына енгізіледі, іс жүзінде жуырда оның қабылдануын күтеміз. Заң жобасы бойынша жұмыс 2019 жылы басталған болатын, - деді вице-министр. -Заң нормаларын жүзеге асыру үшін осы және келесі жылға 55 млрд теңге бөлінді. Келесі айдан бастап мүгедек адамдар және мүгедек балаларды тәрбиелеп отырған отбасылары жаңа жәрдемақы ала бастайды әрі жаңашылдықты сезінеді, - деді Ерлан Әукенов.

Тағы да оқыңыздар:Daewoo Nexia жүргізушісі бір отар қойды қағып кетті