Өңірде шектеу шаралары күшейтілмек

Солтүстік Қазақстан облысының бас санитар дәрігері Әсет Жұматаев жаңа қаулыны бекітті. Жаңа қаулы 9 қазан күні күшіне енеді. Өңірде шектеу шаралары күшейтілмек, деп хабарлайды 7152.kz тілшісі.

Оған  сәйкес, мәдениет нысандарында дайындықтарды жүргізуге, сондай-ақ театр, кинотеатр, бильярд, балалардың ойын орталықтары, компьютер клубтары, боулингтер мен аквапарктердің, түнгі клубтардың, банкет залдары мен караоке клубтардың жұмысына тыйым салынады. Спорттық іс-шаралар көрерменсіз өтіп, түрлі форум-конференциялардың жұмысына, отбасылық мерекелер мен ас берулерге, көрмелерге, корпоратив кештерін өткізуге рұқсат жоқ. Балалардың түзету кабинеттері, балалар мен ересектердің білім беру орталықтары адам санын 15-тен асырмай жұмыс істей алады. Сұлулық салондары мен орталықтары, шаштараздар, медициналық орталықтар, стоматологиялар – алдын ала жазылу бойынша ғана қабылдайды. Ал мейманханалар мен қонақ үйлер толымдылықты 80 %-дан асырмаулары тиіс. Жабық базарлар, СПА-орталықтар, бассейндер мен спорт кешендері сенбі-жексенбі жұмысын тоқтатады. Ал қоғамдық тамақтану орындары сағат 9.00-ден 20.00-ге дейін ғана және адам санын 30-дан асырмай, 50 % толымдылықпен ғана жұмыс істемек. Асханалар сағат 9.00-ден 24.00-ге дейін ашық болмақ. Ал аумағы 2 мың шаршы метрден асатын сауда орталықтары сенбі-жексенбі жұмыс істемейді. Бұл шектеулердің Ashyq жобасына қатысушыларға қатысы жоқ. Олар қосымша талабына сай «сары» мәртебе бойынша жұмысын жалғастырады.

Тағы да оқыңыздар: 44 жастағы азамат алғаш рет жеке куәлігін алды